Mae’r wefan hon wedi’i dylunio i’w defnyddio yn yr ysgol a gartref, gydag adnoddau hawdd eu canfod ar gyfer gweithwyr addysgu proffesiynol, yn ogystal â rhieni a gofalwyr. Yma, gallwch ddod o hyd i syniadau, canllawiau ac adnoddau i'ch cefnogi chi a'ch plentyn. Gallwch ddefnyddio’r hidlenni ar ochr chwith y llyfrgell ‘Adnoddau’ i ddod o hyd i batrwm iaith penodol, maes dysgu a phrofiad penodol, neu i ddod o hyd i hoff fideo, llyfr neu gân!
Mae cyfres ‘Fflic a Fflac’ yn rhoi cyfle i ddysgwyr wylio fideos byr, hwyliog a deniadol, a gwrando arnyn nhw, a fydd yn eu helpu i wella eu hynganiad a datblygu eu sgiliau a’u dealltwriaeth o’r Gymraeg. Bydd y patrymau iaith a’r caneuon yn y fideos hefyd yn cyflwyno cyfleoedd i chi ddefnyddio’r Gymraeg gyda’ch plentyn yn ystod gweithgareddau dyddiol o gwmpas y cartref, e.e. tacluso, amser bwyd, yn yr ardd.
Nod y llyfrau darllen yw annog plant i ddarllen Cymraeg yn annibynnol. Gyda delweddau lliwgar a phatrymau syml, mae’r llyfrau wedi’u dylunio i wneud darllen Cymraeg yn hwyl! Yng nghefn pob llyfr mae rhestr o’r eirfa yn y llyfr a chwestiynau awgrymedig i’w gofyn i’ch plentyn am y stori (gan gynnwys cyfieithiadau Saesneg). Cyfle perffaith ar gyfer ychydig o ddarllen amser gwely gyda'ch plentyn!
Er mwyn cefnogi rhieni a gofalwyr ail iaith gydag ynganiad cywir, mae nodwedd ‘darllen ar goedd’ ddefnyddiol ar yr e-Lyfrau gyda naratif sain o’r geiriau a’r ymadroddion yn y llyfrau. Bydd hyn hefyd yn helpu rhieni a gofalwyr i ddatblygu eu sgiliau Cymraeg eu hunain ar yr un pryd!
Bydd ‘Fflic a Fflac’ yn galluogi eich plentyn i ddefnyddio patrymau a geirfa Gymraeg gyfarwydd yn hyderus ym mhob sefyllfa – dan do ac yn yr awyr agored, yn yr ysgol a gartref.
Nod ‘Fflic a Fflac’ yw rhoi hyder i ddysgwyr ac ymarferwyr ddefnyddio’r Gymraeg a rhoi’r gallu iddynt gyfathrebu yn Gymraeg bob dydd. Mae’r gweithgareddau posibl yn y canllawiau hyn yn awgrymu sut gallai’r darparwyr ddefnyddio’r Gymraeg ym mhob maes dysgu a phrofiad.
Cynulleidfa darged ‘Fflic a Fflac’ yw cylchoedd meithrin ac ysgolion ledled Cymru ac mae’n ymdrin ag amrywiaeth o sefyllfaoedd a gweithgareddau cysylltiedig a fydd yn ysbrydoli plant 3-7 oed ac yn eu hannog i ddefnyddio’r Gymraeg mewn gweithgareddau bob dydd.
Dylai’r deunyddiau hyn gael eu defnyddio dros gyfnodau byr ond rheolaidd a gellid eu haddasu’n hyblyg i’ch anghenion chi eich hun. Bydd gwylio’r fideos a gwrando arnynt yn rheolaidd yn gwella ynganu. Dylai ymarferwyr fanteisio ar bob cyfle i ddefnyddio’r patrymau a’r eirfa ym mhob sefyllfa, dan do ac yn yr awyr agored.
Mae gan y cymeriadau/pypedau (Fflic a Fflac) acenion gwahanol. Mae Fflic yn dod o’r gogledd ac mae Fflac yn dod o’r de. Weithiau, maen nhw’n defnyddio geiriau gwahanol sydd â’r un ystyr, h.y.
| Geiriau Fflic | Geiriau Fflac | Ystyr |
|---|---|---|
| rŵan | nawr | now |
| Tyrd | Dere | Come (command) |
| llefrith | llaeth | milk |
Mae’r cyflwynydd yn defnyddio dwy ffurf ferfol wrth roi cyfarwyddiadau i Fflic a Fflac, e.e.
| Lluosog / Ffurfiol | Unigol | Ystyr |
|---|---|---|
| Edrychwch | Edrycha | Look |
| Gwrandewch | Gwranda | Listen |
Yng nghefn pob llyfr, mae rhestr o eirfa ac iaith i’w defnyddio wrth gyflwyno, darllen a thrafod y storïau hyn. Gallwch addasu’r iaith sy’n cael ei hawgrymu i’w defnyddio ag unrhyw lyfr.
